Revelation of John 12
Di ahina mo di manu-“dragon”
1Di ada haga gologolo dangada ga gila i di langi: Di ahina e hai dono gahu gi di laa, gei di malama la i-lala onoo babaawae. Gei mee e hai dono hau heduu e madangaholu maa lua i dono libogo. 2Mee hoohoo ga haanau, di mmae mo di duadua o di haanau gu hai a mee gi dangidangi.3Di ada labelaa ga gila aga i di langi: Di manu-“dragon” mmee damanaiee, onoo libogo e hidu, ge madangaholu madaagoo, mo onoo hau king dagidahi i hongo ono libogo. a 4Dono hugu ga mmoli dahi baahi e dolu o nia heduu gi daha mo di langi, ga kili nia maa gi henuailala. Mee ga duu i mua di ahina belee gai di tama a maa ma ga haanau. b 5Di ahina deelaa ga haanau dana dama daane, dela ga dagi nia henua llauehe huogodoo gi togodogo baalanga. Gei di tama la ga daa gi daha hagalimalima ga lahi gi God mo dono lohongo king. c 6Di ahina deelaa ga lele gi daha gi di anggowaa, gi di gowaa a God ne hagatogomaalia gi mee, e madamada humalia ai ei mee i lodo nia laangi e mana maa lua lau modoono(1,260). 7Tauwa ga daamada i di langi. Michael mo ana gau di langi ga heebagi gi di manu-“dragon”, gei di manu-“dragon” mo ana gau di langi ga heebagi gi digaula. d 8Gei di manu-“dragon” la gu magedaa, gei mee mo ana gau di langi la gu hagalee dumaalia ginai gi noho i di langi. 9Di manu-“dragon” damanaiee la gu hudu gi daha mo di langi, deenei la go di gihaa namua dela e haga ingoo bolo “Devil” be go Satan, dela e halahalau henuailala hagatau. Mee mo ana gau di langi huogodoo la ne kili gi lala gi henuailala. e
10Gei au ga longono di lee damana i di langi e helekai, “Dolomeenei di hagamouli a God la gu hanimoi! Dolomeenei tadau God gu hagi aga dono mogobuna king! Dolomeenei dana Messiah gu hagi aga dono mogobuna dagi! Idimaa, mee dela nogo duu i mua tadau God, nogo haga huahuaidu tadau duaahina hagadonu, boo mo aa, la gu hudu gi daha mo di langi. f 11Tadau duaahina hagadonu gu maaloo i mee, mai i nia dodo o Ta maa siibi mo mai i di tonu dela e hagadele go digaula. Digaula gu baba hua di dugu anga nadau mouli gi mmade, i di gili di tonu deelaa. 12Goodou i di langi gi tentene, go goodou huogodoo ala e noho i golo! Gei e huaidu huoloo ang gi henuailala mo di moana! Idimaa, di “Devil” la gu hanimoi gi goolua, gei mee e hagawelewele huoloo, idimaa, mee e iloo ia bolo dono madagoaa dela e dubu le e bodobodo.”
13Di madagoaa di manu-“dragon” ne iloo ia bolo ia gu hudu ia gi henuailala, geia ga daamada ga halahala di ahina dela ne haanau dana dama daane. 14Nia bakau llauehe e lua o di manu-‘eagle’ ne wanga gi di ahina deelaa belee maangi ei mee gi dono lohongo i lodo di anggowaa, go di gowaa dela ga madamada humalia iei mee i nia ngadau e dolu mo di baahi, e benebene gi daha mo di manu-“dragon”. g 15Di manu-“dragon” ga bui ana wai mai i lodo dono ngudu i muli di ahina, bolo gi dehee a mee gi daha. 16Gei henuailala ga hagamaamaa di ahina, ne huge dono ngudu, ga holo nia wai ala ne lloomoi i di ngudu di manu-“dragon”. 17Di manu-“dragon” ga hagawelewele gi di ahina mo di hana e heebagi gi nia hagadili di ahina ala i golo, go digau huogodoo ala e haga kila aga nnaganoho a God, gei e manawa dahi gi di tonu dela gu haga modongoohia go Jesus. 18Gei di manu-“dragon” ga duu i tongotai.
Copyright information for
KPG